Чирмешәндә мәктәп укучыларының чыгарылыш кичәсе узды
Традиция буенча, инде икенче ел рәттән, төп чара башланганчы, район җитәкчесе Рамил Айбатов “Укудагы уңышлары өчен” медале ияләре һәм бердәм дәүләт имтиханнарын югары балларга тапшырган чыгарылыш сыйныф укучылары белән очрашты.
Егетләр һәм кызлар район башлыгына үзләрен кызыксындырган сорауларны бирделәр. Әйтик, районда кайсы тармакларда белгечләр җитми, монда кайтып төпләнгән яшьләргә нинди ярдәм күрсәтелә, җитәкче нинди сыйфатларга ия булырга тиеш һәм башкалар.
Рамил Тәлгать улы бер генә сорауны да җавапсыз калдырмады. Әле кичә генә мәктәп укучылары, ә бүген инде студент булырга әзерләнгән яшьләргә котлауларын ирештерде.
-Сезгә киләчәктә дә уңышлар телим. Үзегез теләгән һөнәрләрне үзләштергәннән соң, үзебезнең районга кайтып, шунда төпләнеп, туган районыбыз үсешенә өлеш кертерсез дип өметләнәм, - диде ул.
Очрашудан соң район мәдәният йортында чыгарылыш кичәсе башланды.
Быел район мәктәпләрендә 11 сыйныфны 60 укучы тәмамлаган. Шуларның 20се бердәм дәүләт имтиханнарын югары балларга тапшырган. 9 егет һәм кыз – “Укудагы уңышлары өчен” медале иясе: 6сы – I дәрәҗә, ике “4”ле билгесе булган өч укучы – II дәрәҗә. Ни кызганыч, быел Иске һәм Яңа Элмәле, Иске Үтәмеш мәктәпләрендә бер генә чыгарылыш сыйныф укучысы да юк. Ивашкино, Ульяновка, Күтәмә мәктәпләрен икешәр укучы тәмамлаган. Иң зур чыгарылыш Чирмешән лицеенда – 22 укучы.