Чирмешән муниципаль районы

"Татарстан Республикасы Ел укытучысы -2014" бәйгесенең муниципаль этабы тәмамланды

2014 елның 5 марты, чәршәмбе

Агымдагы ел мәктәп һәм укытучыларга бәйле әһәмиятле, кызыклы, мавыктыргыч вакыйгаларга бай булды. Шуларның берсе - "Татарстан Республикасы Ел укытучысы - 2014" конкурсы. Әлеге бәйге педагогик осталыкны камилләштерүдә мөһим роль уйный. Конкурс озак еллар үткәрелеп, бай традициягә ия булса да, ул Чирмешән районының зур һәм тату укытучылар коллективы тарафыннан һәр елны көтеп алына.

2014 елның 5 мартында 1 нче Чирмешән урта мәктәбенең актлар залында укытучыларның һөнәри осталыгын камилләштерү бәйгесендә җиңүчеләрне һәм призерларны тантаналы рәвештә тәбрикләү булды. Актлар залында төрле яшьтәге һәм төрле фәннәрдән белем бирүче педагоглар җыелган иде. Конкурс барышында алар тематик ачык дәресләр бирделәр, тәҗрибә уртаклаштылар, төрле методик материаллар тәкъдим иттеләр. Аларның барысының да максатлары уртак - рухи һәм физик яктан көчле, әхлак тәрбияле, илгә файдалы кешеләр тәрбияләү.

"Татарстан Республикасы Ел укытучысы - 2014" конкурсының җиңүчеләре түбәндәгеләр: 1 урында - Чирмешән лицее укытучысы Галия Исмәгыйль кызы Кәримова, 2 урында - Лашман урта мәктәбеннән Кадрия Рәвгать кызы Динмөхәммәтова, 3 урында Ивашкино урта мәктәбеннән Наталья Алексеевна Яманова һәм Чирмешән кадет мәктәп-интернатыннан Елена Леонидовна Меркулова.

"Татарстан Республикасы 2014 ел педагог-китапханәчесе" бәйгесенең дә җиңүчеләре билгеләнде. 1 урында - Чирмешән лицееннан Альбина Алик кызы Яруллина, Ульяновка мәктәбеннән Валентина Николаевна Иванова, 1 нче Чирмешән урта мәктәбеннән Наталья Александровна Миронова, 2 нче Чирмешән мәктәбеннән Римма Леонидовна Игнатьева.

Җиңүчеләр конкурсның Лениногорск шәһәрендә үтәчәк зона этабында катнашачак, уңышлар сезгә!

Чирмешән муниципаль районы башкарма комитетының "Мәгариф бүлеге" МУ

БАРЛЫК ЯҢАЛЫКЛАРНЫ УКУ