Халыкара хатын-кызлар көне уңаеннан район башлыгы Н.Ш.Зарипов катнашында тантаналы чара

Чарага чакырылган кунаклар арасында Александра Кудряшованы “Хатын-кыз – хезмәт“ номинациясендә билгеләп уздылар. Ивашкинодан фермер хатыны – Александра Васильевна Кудряшова  гаилә белән быел күп итеп яшелчә - гектарлаган мәйданнарда кәбестә, суганның кара орлыгы, аш чөгендере, кишер, сарымсак үстергән.

Чирмешәннән Галия Сафиуллина соңгы елларда шагыйрә буларак танылды. “Хатын-кыз – сәнгать“ номинациясендә бүләк алган якташыбыз шигырьләренең кайберләренә көй дә язылган. Радио, телевидениедан иҗат җимешләре яңгырап тора.

Иске Элмәледән Валентина Захарованы “Хатын-кыз – күп балалы ана“, Чирмешәннән Гөлүзә Мингулованы “Минем язмыш – минем һөнәрем“, Чирмешәннән Рәзилә Латыйпованы “Мәрхәмәтле эшләр юлыннан“, Людмила Кузинаны “Хатын-кыз- иҗат“, Вера Алкаеваны “Хатын-кыз – оста“ номинациясендә бүләкләделәр.

Чирмешәндәге ресторанда узган бу чарада артистларыбыз исә, җырлап-биеп, кунакларның күңелен күрде. Залда кул эшләнмәләреннән күргәзмә дә оештырылды.

Хатын-кызларны бәйрәм уңаеннан Россия ЭЭМның "Чирмешән" муниципальара бүлеге начальнигы Фаяз Минһаҗев һәм район прокуроры Рим Сөнгатуллин да тәбрикләделәр.

Бәйрәм җыр-биюләр белән үрелеп барды, кунакларга район башлыгының бүләкләрен - пакетлар да өләштеләр.