Чирмешән муниципаль районы

Габдулла Мөхәммәтшин 90 яшьлек юбилеен билгеләп үтте

2015 елның 17 марты, сишәмбе

Бөек Ватан сугышы ветераны Габдулла Мөхәммәтшин Лашман авылының иң өлкән кешеләренең берсе, аңа 90 яшь тулды. Бу көнне авыл картларын җыеп, аларда Коръән ашы үткәргәннәр, аксакалны туган көне белән котларга туганнары килгән. Юбилярны район җитәкчесе Фердинат Дәүләтшин дә тәбрикләде, Россия Президентының Котлау открыткасын һәм бүләкләр тапшырды.

-Гомер бәйрәмегез белән ихлас күңелдән тәбрик итәбез, сәламәтлек, бәхет, шатлык – куанычлар, бу дөньяның рәхәтен күреп тагын озак яшәвегезне телибез, - диде котлау сүзендә Фердинат Мидхәт улы.

Габдулла абый 17 яшендә үк фронтка китә. Брянск, Смоленск, Орел өлкәләрен азат итүдә катнаша. Белоруссиядә барган сугышларның берсендә ул каты яралана һәм әсирлеккә эләгә. 1 ел 4 айны якташыбыз немец концлагерьларында уздыра. Аны 1945нче елның май аенда совет гаскәрләре азат итә. Әмма туган ягына ул 1950нче елны гына, тагын биш ел армиядә хезмәт итеп кайта. Габдулла абый гомере буе «Сельхозтехника» оешмасында хезмәт куеп, лаеклы ялга чыга.

Күптән түгел генә Габдулла Мөхәммәтшинның «Мәңге җуелмас хатирәләр» исемле китабы да дөнья күрде. Анда якташыбыз үзенең гомер юлын тасвирлаган.

-Барысы да истә, онытылмый шул. Андыйны беркемгә дә күрергә язмасын. Тынычлыкта тату яшәгез , - ди ветеран. – Безне шулай зурлап килгәнегез өчен дә зур рәхмәт.

Ветеранны олуг юбилее белән аны шефлыкка алган «Энерготехсервис» оешмасы җитәкчесе Илдар Нуруллин да котлаган, бүләкләр алып килгән. Оешма монтерлары Габдулла абыйның йортында электр үткәргечләрне яңартканнар.

Оценить материал и/или оставить мнение

БАРЛЫК ЯҢАЛЫКЛАРНЫ УКУ