Республика көне

30 августта Чирмешәндә зурлап Республика көне уздырылды.

Бәйрәм чаралары яшьләр, балалар, спорт мәйданчыкларында, Җиңү паркында оештырылды. Бәйрәм хөрмәтенә мәдәният хезмәткәрләре матур итеп бизәлгән палаткаларда табыннар әзерләп, халыкны тәм-томнар,  самавырлардан чәй белән сыйладылар. Балалар сәхнәсендә башлангыч сыйныф укучылары һәм балалар бакчаларына йөрүчеләр концерт тәкъдим иттеләр. 

Чараның тантаналы өлешен район башлыгы Наил Зарипов ачып җибәрде. Ул әлеге бәйрәмнең зур әһәмияткә ия булуын билгеләп үтте, Республикада һәм районда барган матур үзгәрешләр - үсеш турында ассызыклап үтте, чирмешәнлеләрне зур бәйрәм белән котлады. Чирмешәнлеләрне Республика Президенты исеменнән Тарифлар буенча ТР дәүләт комитеты рәисе Марат Зарипов тәбриуләде.

Бәйрәм концертында район үзешчәннәре чыгыш ясадылар, "Чирмешән энҗеләре" коллективы да бәйрәмнең бизәге булды.