Ивашкино авыл җирлегендә халык җыены уздырылды

Авыл җыенында район башлыгы урынбасары Миләүшә Батыршина катнашты, биредә халыкны борчыган мәсьәләләр дә каралды.

Авыл җирлеге башлыгы Никонор Ефимов башкарма комитетның ярты еллык эшчәнлегенә хисап тотты. Алдагы чорга перспективалар белән таныштырды. Авылдагы оператив хәлнең торышы белән участок уполномоченные Марат Кәбиров таныштырды.

Авыл җирлегендә барлыгы 367 йорт исәпләнә, 1356 кеше яши. Шуларның 1301е - чуваш, 8се - татар, 41е - рус милләтеннән. 2015 елның 6 аенда 3 бала туган, 11 кеше бакыйлыкка күчкән. Авыл җирлегендә 2 мәктәп, 2 мәдәният йорты, 2 балалар бакчасы, почта, 2 ФАП бар.

2014 ел үзсалым буенча 71400 сум акча җыелган, республика программасы буенча өстәлгән сумма белән ул 357000  сум тәшкил итә. Әлеге акчалар ике каберлек коймасын буяуга, чишмәне төзекләндерүгә, чүплекне тәртипкә китерүгә тотылачак.